👉លោកប្រធានាធិបតី ស៊ី ជីនពីង ប្រាប់សម្តេច ហ៊ុន ម៉ាណែត ផ្ទាល់មាត់ ៖ «ចិនគាំទ្រកម្ពុជាពង្រឹងសមត្ថភាពការពារខ្លួន» -

Spread the love

រាជធានីភ្នំពេញ៖ «ចិន នឹងបន្តគាំទ្រកម្ពុជា ក្នុងការពង្រឹងសមត្ថភាព និងការអភិវឌ្ឍដោយម្ចាស់ការខ្លួនឯង ក៏ដូចជាការការពារអធិបតេយ្យភាពជាតិរបស់ខ្លួន»។ នេះសារដ៏សំខាន់មួយដែលមេដឹកនាំកំពូលរបស់ចិន លោកប្រធានធិបតីចិន ស៊ី ជីនពីង បានលើកឡើងក្នុងជំនួបទល់មុខជាមួយមេដឹកនាំកម្ពុជា សម្តេចនាយករដ្ឋមន្រ្តី ហ៊ុន ម៉ាណែត នៅថ្ងៃទី៣០ ខែសីហា ឆ្នាំ២០២៥នេះ។

រូបភាពឯកសារក្នុងការធ្វើសមយុទ្ធរវាងកងទ័ពកម្ពុជា-ចិនកាលពីឆ្នាំ២០២៣ (រូបពីក្រសួងការពារជាតិកម្ពុជា)។

រថក្រោះត្រូវបានប្រើក្នុងការធ្វើសមយុទ្ធរវាងកងទ័ពកម្ពុជា-ចិនកាលពីឆ្នាំ២០២០ (រូបពីក្រសួងការពារជាតិកម្ពុជា)។ — រូបភាពឯកសារក្នុងការធ្វើសមយុទ្ធរវាងកងទ័ពកម្ពុជា-ចិនកាលពីឆ្នាំ២០២៣ (រូបពីក្រសួងការពារជាតិកម្ពុជា)។

តបតាមការអញ្ជើញរបស់លោក ស៊ី ជីនពីង ប្រមុខរាជរដ្ឋាភិបាលកម្ពុជា បានដឹកនាំប្រតិភូទៅចូលរួមកិច្ចប្រជុំកំពូលអង្គការសហប្រតិបត្តិការសៀងហៃ នៅទីក្រុងធានជីន ប្រទេសចិន ពីថ្ងៃទី៣០សីហានេះ រហូតដល់ថ្ងៃ១កញ្ញា។ ក្នុងជំនួបជាមួយសម្តេចធិបតី លោក ស៊ី ជីនពីង បានផ្តល់សារៈសំខាន់ក្នុងការជំរុញកិច្ចសហប្រតិបត្តិការរវាងកម្ពុជា-ចិនឱ្យតែរឹងមាំ។

ចំណុចសំខាន់មួយទៀត ប្រធានាធិបតីនៃមហាយក្សចិន ក៏ប្រកាសគាំទ្របទឈប់បាញ់រវាងកម្ពុជា-ថៃផងដែរ ហើយព្រមទាំងគាំទ្រដល់យន្តការសង្កេតការណ៍របស់អាស៊ានទៅលើបទឈប់បាញ់នេះ។ យន្តការសង្កេតការណ៍ ដឹកនាំដោយម៉ាឡេស៊ី ជាប្រធានអាស៊ានសម្រាប់ឆ្នាំ២០២៥នេះ។ សម្តេចនាយករដ្ឋមន្រ្តី បានបង្ហោះលើគណនីហ្វេសប៊ុកអំពីខ្លឹមសារសង្ខេប និងរូបភាពជំនួបជាមួយលោកប្រធានាធិបតីចិន។

*ជំនួបរវាងថ្នាក់ដឹកនាំកម្ពុជា និងថ្នាក់ដឹកនាំចិន*

គួររម្លឹកឡើងវិញថា បទឈប់បាញ់រវាងកម្ពុជា-ថៃ ត្រូវបានបង្កើតឡើងនៅម៉ាឡេស៊ី កាលពីថ្ងៃទី២៨កក្កដា ដោយមានការជំរុញពីលោក ដូណាល់ ត្រាំ ប្រធានាធិបតីអាម៉េរិក និងមានការគាំទ្រដោយចិនផងដែរ។ កិច្ចប្រជុំស្តីពីការបង្កើតបទឈប់បាញ់នេះ ផ្តួចផ្តើម និងជួយសម្របសម្រួលដោយម៉ាឡេស៊ី ហើយក្នុងកិច្ចប្រជុំនាពេលនោះ សុទ្ធតែមានតំណាងប្រទេសមហាអំណាចអាម៉េរិក-ចិនចូលរួម៕