👉 កម្ពុជា ស្នើឱ្យមានយុទ្ធនាការជាសកលប្រឆាំងនឹងការប្រើ «គ្រាប់បែកចង្កោម» របស់យោធាថៃ ..!! -

Spread the love

កម្ពុជា ស្នើឱ្យមានយុទ្ធនាការជាសកលប្រឆាំងនឹងការប្រើ «គ្រាប់បែកចង្កោម» របស់យោធាថៃ

ភ្នំពេញ៖ លោក លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន បានស្នើទៅកាន់អង្គការជំនួយរបស់ប្រជាពលរដ្ឋន័រវែស (Norwegian People’s Aid) នៃប្រទេសន័រវេស ឱ្យជួយធ្វើយុទ្ធនាការជាសកលប្រឆាំងនឹងការប្រើប្រាស់គ្រាប់បែកចង្កោមរបស់យោធាថៃ។

លោក លី ធុជ បានប្រាប់ទៅកាន់ លោក Hans Risser នាយកអង្គការ NPA ប្រចាំកម្ពុជា នៅក្នុងជំនួបពិភាក្សាការងារ ដែលធ្វើឡើងនាថ្ងៃទី ៦ ខែសីហានេះថា ក្នុងជម្លោះប្រដាប់អាវុធរវាងកម្ពុជា-ថៃ រយៈពេល ៥ថ្ងៃ ចាប់ពីថ្ងៃទី២៤-២៨ ខែកក្កដា កន្លងនេះ យោធាថៃបានប្រើប្រាស់សព្វាវុធធុនធ្ងន់គ្រប់ប្រភេទដែលពិភពលោកហាមប្រាម ក្នុងនោះរួមទាំងការប្រើប្រាស់គ្រាប់បែកចង្កោម ដើម្បីឈ្លានពានមកលើទឹកដីកម្ពុជា។

ការប្រើប្រាស់គ្រាប់បែកចង្កោមរបស់យោធាថៃ បានបង្កនូវផលប៉ះពាល់យ៉ាងធ្ងន់ធ្ងរ និងបង្កគ្រោះថ្នាក់យូរអង្វែងដល់ប្រជាជនកម្ពុជាស្លូតត្រង់ ជាពិសេសក្មេងតូចៗ ក៏ដូចបង្កភាពភ័យខ្លាចដល់សហគមន៍ជាច្រើនជំនាន់ទៅមុខទៀតផង។ ជំនួសមុខឱ្យរដ្ឋាភិបាល និងពលរដ្ឋកម្ពុជា លោក លី ធុជ ស្នើឱ្យអង្គការ NPA នៃប្រទេសន័រវេស គាំទ្រកម្ពុជា និងជួយធ្វើយុទ្ធនាការជាសកល ដើម្បីប្រយុទ្ធប្រឆាំងនឹងការប្រើប្រាស់គ្រាប់បែកចង្កោមរបស់យោធាថៃ មកលើប្រទេសកម្ពុជា។

លោក លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន រួមនឹងក្រុមការងារ បានជួបពិភាក្សាការងារជាមួយ លោក Hans Risser នាយកអង្គការជំនួយរបស់ប្រជាពលរដ្ឋន័រវែស នៅទីស្នាក់ការអាជ្ញាធរមីន នាថ្ងៃទី ៦ ខែសីហា។

បើតាម លោក ហេង រតនា អគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC) ដែលបានបង្ហោះនៅលើទំព័រហ្វេសប៊ុកផ្ទាល់ខ្លួនកាលពីថ្ងៃទី ២៥ ខែកក្កដា គ្រាប់បែកចង្កោម ស្ថិតនៅក្រោមការហាមឃាត់នៃ «អនុសញ្ញាគ្រាប់បែកចង្កោមអន្តរជាតិ»។ អនុសញ្ញានេះមានគោលបំណងហាមឃាត់ការប្រើប្រាស់ ការផលិត ការផ្ទេរ និងការស្តុកទុកគ្រាប់បែកចង្កោម ដែលជាអាវុធដ៏គ្រោះថ្នាក់បង្កផលប៉ះពាល់ធ្ងន់ធ្ងរដល់ជនស៊ីវិល។

នៅក្នុងសង្គ្រាមឈ្លានពានទឹកដីកម្ពុជា យោធាថៃបានប្រើប្រាស់គ្រាប់បែកចង្កោម តាមរយៈគ្រាប់ «កាំភ្លើង ១៥៥មម» ដែលបាញ់ពីកាំភ្លើងធំប្រភេទ (M758 ATMG 155 mm) បាញ់បានចម្ងាយប្រមាណ៤០គីឡូម៉ែត្រ។ ក្នុងគ្រាប់ផ្លោង ១៥៥មមមួយគ្រាប់ មានកូនគ្រាប់បែកចង្កោមចំនួន ៥៦គ្រាប់។

បច្ចុប្បន្ន មានប្រទេស ១២៤ជាសមាជិករដ្ឋភាគីនៃអនុសញ្ញាគ្រាប់បែកចង្កោមអន្តរជាតិនេះ។ ដូច្នេះ លោក ហេង រតនា ចាត់ទុក ការប្រើប្រាស់គ្រាប់បែកចង្កោមពីសំណាក់យោធាថៃមកលើកម្ពុជា គឺជាការរំលោភអនុសញ្ញាអន្តរជាតិយ៉ាងធ្ងន់ធ្ងរបំផុត៕