វីរកងទ័ព ដែលរងរបួសចំភ្នែក ត្រូវបានបញ្ជូនមកមន្ទីរពេទ្យអង្គឌួងទាំងយប់..!!
វីរកងកងទ័ពខ្មែរម្នាក់ ដែលរងរបួសភ្នែកខាងស្តាំ ក្នុងហេតុការណ៍ប៉ះទង្គិចគ្នានៅភូមិព្រៃចាន់ ឃុំអូរបីជាន់ កាលពីល្ងាចថ្ងៃទី១៧ កញ្ញា បានទទួលការសង្គ្រោះបឋមពីក្រុមគ្រូពេទ្យ មុននឹងបញ្ជូនបន្តទាំងយប់ មកកាន់មន្ទីរពេទ្យព្រះអង្គឌួង នៅរាជធានីភ្នំពេញ។ លោក ឡេ ច័ន្ទសង្វាត ប្រធានមន្ទីរសុខាភិបាលខេត្តបន្ទាយមានជ័យ បញ្ជាក់ដូច្នេះនៅគណនីហ្វេសប៊ុក។
-តាមសំណេរដដែល លោក ឡេ ច័ន្ទសង្វាត បញ្ជាក់ថា យ៉ាងហោចមាន ពលរដ្ឋ និងព្រះសង្ឃសរុប ២៩ អង្គ/នាក់ បានរងរបួសធ្ងន់ និងស្រាល។ ពាក់ព័ន្ធនឹងករណីនេះ ក្រសួងការពារជាតិ នៅយប់ថ្ងៃទី១៧ ខែកញ្ញា បានគូសបញ្ជាក់ ថា កម្លាំងចម្រុះថៃ បានប្រើរថយន្តបំពាក់ឧបករណ៍បំពងសំឡេង និងកាំភ្លើងបាញ់ឧស្ម័នបង្ហូរទឹកភ្នែក មកលើកងកម្លាំង និងពលរដ្ឋកម្ពុជា ដែលហេតុការណ៍នេះ កើតឡើងតែប៉ុន្មាននាទីប៉ុណ្ណោះ ក្រោយការចាកចេញ របស់ក្រុមអ្នកសង្កេតការណ៍អន្តរកាល (IOT) ដឹកនាំដោយប្រទេសម៉ាឡេស៊ី ដែល បានចុះសង្កេតការណ៍នៅភូមិព្រៃចាន់ ឃុំអូរបីជាន់ ស្រុកអូរជ្រៅ។
-ក្រសួងការពារជាតិបញ្ជាក់ដូច្នេះថា៖ «លុះដល់ម៉ោង១៦:២០នាទី ថ្ងៃខែឆ្នាំដដែល កម្លាំងចម្រុះរបស់ភាគីថៃបានប្រើប្រាស់ រថយន្តបំពាក់ឧបករណ៍បំពងសំឡេង និងកាំភ្លើងបាញ់ឧស្ម័នបង្ហូរទឹកភ្នែកមកលើកងកម្លាំង និងប្រជាពលរដ្ឋកម្ពុជា ក្រោយពីក្រុមអ្នកសង្កេតការណ៍អន្តរកាល (IOT) ដឹកនាំដោយប្រទេសម៉ាឡេស៊ី បានចុះ សង្កេតការណ៍ នៅភូមិព្រៃចាន់ ឃុំអូរបីជាន់ ស្រុកអូរជ្រៅ ដើម្បីសង្កេត ផ្ទៀងផ្ទាត់ និងរាយការណ៍ អំពីស្ថានភាពព្រំដែន នៅវេលាម៉ោង ១៣:៥៧នាទីរសៀល ហើយទើបតែបានចាកចេញពីទីតាំងនោះមិន បានប៉ុន្មាននាទីផង។»។
រូបភាព៖ ហ្វេសប៊ុក លោក ឡេ ច័ន្ទសង្វាត ប្រធានមន្ទីរសុខាភិបាលខេត្តបន្ទាយមានជ័យ
នៅម៉ោងប្រមាណ ១៩ និង២២នាទីយប់ថ្ងៃ១៧កញ្ញាដដែល ក្រុមអ្នកសង្កេតការណ៍អន្តរកាល (IOT) ដដែល បាន នចុះទៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យម្តងទៀត ដើម្បីពិនិត្យទីកន្លែង នៃការផ្ទុះការប៉ះទង្គិចដែលបង្កឡើងដោយភាគីថៃ។ នេះបើតាមក្រសួងការពារជាតិកម្ពុជា ដែលបានចាត់ទុកទង្វើរបស់កម្លាំងចម្រុះថៃ ថា ជាការរំលោភបំពានយ៉ាងធ្ងន់ធ្ងរ លើស្មារតីនៃបទឈប់បាញ់ និងគោលការណ៍ទាំងឡាយដែលភាគីទាំងពីរបានឯកភាពគ្នា នៅក្នុងកិច្ចប្រជុំ GBC និង RBC ទាំងអស់កន្លងមក។
ការយកច្បាប់អាជ្ញាសឹក និងច្បាប់ក្នុងស្រុករបស់ថៃ មកអនុវត្តក្នុងដែនអធិបតេយ្យរបស់កម្ពុជា គឺជាការបំពានយ៉ាងធ្ងន់ធ្ងរមកលើអធិបតេយ្យកម្ពុជា និងច្បាប់អន្តរជាតិ ក្នុងនោះរួមទាំងធម្មនុញ្ញអង្គការសហប្រជាជាតិ ធម្មនុញ្ញអាស៊ាន សន្ធិសញ្ញាមិត្តភាព និងកិច្ចសហប្រតិបត្តិការនៅតំបន់អាស៊ីអាគ្នេយ៍ និងគោលការណ៍ច្បាប់ដែលទទួលស្គាល់ជាសកលដទៃទៀត។ ទន្ទឹមនឹងនេះ កម្ពុជាស្នើឱ្យភាគីថៃ គោរពឱ្យបានខ្ជាប់ខ្ជួន និងម៉ឺងម៉ាត់នូវស្មារតីនៃបទឈប់បាញ់ ក៏ដូចជាការព្រមព្រៀងទាំងឡាយ នៃកិច្ចប្រជុំ GBC និងកិច្ចប្រជុំ RBC កន្លងមក។
គួរបញ្ជាក់ដែរថា ហេតុការណ៍ប៉ះទង្គិចគ្នានេះ កើតឡើងដោយសារកម្លាំងចម្រុះថៃ រួមមានកម្លាំងតម្រួតព្រំដែន ទាហានប៉ារ៉ា ទាហានឈុតខ្មៅ នគរបាល និងពលរដ្ឋស្រុកគោកធ្យូង ប្រហែល ៣០០នាក់ មានអាវុធគ្រប់ដៃ និងមានឧបករណ៍សម្រាប់ទប់ស្កាត់បាតុកម្ម ខ្លះទៀតមានជំពាមកៅស៊ូ បានចូលមករាយបន្លាលួស នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នៅម៉ោង៣ និង៣០នាទីរសៀលថ្ងៃទី១៧ ខែកញ្ញា។
ឆ្លើយតបនឹងសកម្មភាពបំពាននេះ ពលរដ្ឋកម្ពុជា បានតវ៉ា និងឆ្លើយតបដោយសន្តិវិធី ដើម្បីការពារដែនអធិបតេយ្យរបស់កម្ពុជា ព្រមទាំងទ្រព្យសម្បតិ្តស្របច្បាប់ដែលពួកគាត់បានគ្រប់គ្រង និងអាស្រ័យផលជាច្រើនឆ្នាំមកហើយ។
ក្នុងអំឡុងពេលនោះ កងកម្លាំង និងអាជ្ញាធរមានសមត្ថកិច្ចចម្រុះរបស់កម្ពុជា ដែលមិនប្រដាប់ដោយអាវុធ ក៏មានវត្តមាននៅទីកន្លែងកើតហេតុនោះដែរ ដើម្បីការពារសុវត្ថិភាពជូនពលរដ្ឋខ្លួន ដោយប្រកាន់ខ្ជាប់បំផុតនូវការគោរព និងការអនុវត្តបទឈប់បាញ់ រួមទាំងគោលការណ៍ដែលកម្ពុជា-ថៃបានឯកភាពគ្នា៕
About The Author
