👉ប្រធានាធិបតីអាម៉េរិក គាស់ឈ្មោះ «ក្រសួងសង្រ្គាម» មកប្រើជំនួស «ក្រសួងការពារជាតិ» ..!! -

Spread the love

ប្រធានាធិបតីអាម៉េរិក លោក ដូណាល់ ត្រាំ ចុះហត្ថលេខាប្តូរឈ្មោះក្រសួងការពារជាតិ ទៅជាក្រសួងសង្រ្គាម នៅថ្ងៃទី៥ ខែកញ្ញា។ រូបភាព AFP

ប្រធានាធិបតីអាម៉េរិក លោក ដូណាល់ ត្រាំ នៅថ្ងៃទី៥ ខែកញ្ញា បានបន្ថែមឈ្មោះ «ក្រសួងសង្រ្គាម» មួយទៀត សម្រាប់ប្រើជំនួស «ក្រសួងការពារជាតិ»។ ក្រសួងសង្រ្គាមនេះ ជាឈ្មោះទីពីររបស់មន្ទីរបញ្ចកោណអាម៉េរិក ហើយនឹងត្រូវប្រើប្រាស់ជាផ្លូវការទាំងកិច្ចការទំនាក់ទំនងខាងក្រៅ និងខាងក្នុង។

បន្ទាប់ពីឈប់ប្រើប្រាស់ចាប់តាំងពីឆ្នាំ១៩៤៧ ប្រធានាធិបតីអាម៉េរិក លោក ដូណាល់ ត្រាំ នៅថ្ងៃទី៥ ខែកញ្ញា បានគាស់ឈ្មោះ «ក្រសួងសង្រ្គាម» មកប្រើប្រាស់ជាថ្មីសម្រាប់ជាឈ្មោះទីពីរ និងប្រើជំនួសក្រសួងការពារជាតិ។ បានសេចក្តីថា ក្រសួងការពារជាតិ មិនត្រូវផ្លាស់ប្តូរឈ្មោះឡើយ ពោលគឺបន្ថែមឈ្មោះ «ក្រសួងសង្រ្គាម» ជាឈ្មោះទីពីរ។

បើទោះជាឈ្មោះទីពីរ ក្រសួងសង្រ្គាម នឹងត្រូវប្រើប្រាស់ជាផ្លូវការជំនួសឈ្មោះក្រសួងការពារជាតិ។ សូម្បីរដ្ឋមន្រ្តីការពារជាតិ ក៏ត្រូវហៅជារដ្ឋមន្រ្តីសង្រ្គាមដែរ។ ទន្ទឹមនេះ រដ្ឋបាលរបស់លោក ត្រាំ ក៏នឹងស្វះស្វែងរកការគាំទ្រពីសភា ដើម្បីផ្លាស់ប្តូរឈ្មោះក្រសួងទាំងស្រុង និងអចិន្រ្តៃយ៍តែម្តង។ នេះបើតាមការចុះផ្សាយរបស់សារព័ត៌មាន BBC។

«ខ្ញុំគិតថា វាជាឈ្មោះសមស្របជាង ស្របពេលស្ថានភាពពិភពលោកកំពុងវិវត្ត ក្នុងពេលបច្ចុប្បន្ន»។ លោក ត្រាំ បានសង្កត់ធ្ងន់បែបនេះ នៅការិយាល័យ Oval របស់សេតវិមាន ក្នុងថ្ងៃទី៥ ខែកញ្ញា ដោយបន្តថា ក្រសួងសង្រ្គាម ជាការបញ្ជូនសារនៃជ័យជម្នះ។

ចាប់តាំងពីឆ្នាំ១៧៨៩ អាម៉េរិក បានប្រើប្រាស់ «ក្រសួងសង្រ្គាម» មុនពេលប្តូរជា «ក្រសួងការពារជាតិ» ដោយលោកប្រធានាធិបតី Harry Truman នៅក្នុងឆ្នាំ១៩៤៧ ដើម្បីបង្រួបបង្រួម ក្រសួងសង្រ្គាម និងយោធា ឱ្យនៅក្រោមស្ថាប័នតែមួយ។

ក្នុងការផ្លាស់ប្តូរឈ្មោះរបស់ក្រសួងបែបនេះ វាត្រូវការចាយលុយរដ្ឋ ជាច្រើនពាន់លានដុល្លារ។ យ៉ាងណាមិញ រដ្ឋបាលរបស់លោក ត្រាំ មិនបានបញ្ជាក់ពីការចំណាយនេះឡើយ៕