កម្ពុជានឹងមានភ្លៀងធ្លាក់ពីថ្ងៃទី១២-១៩ សីហា ដោយសារឥទ្ធិពលព្យុះទី១១«ផដូល»
ភ្នំពេញ៖ តាមការព្យាករអាកាសធាតុរបស់ក្រសួងធនធានទឹក និងឧតុនិយម កម្ពុជានឹងមានភ្លៀងធ្លាក់ ចន្លោះពី២៥-៣៥ភាគរយ តាមតំបន់មួយចំនួន ចាប់ពីថ្ងៃទី១២-១៩ ខែសីហា ដោយសារឥទ្ធិពលព្យុះទី១១ ឈ្មោះផដូល (Podul) T2511 ឆ្នាំ២០២៥។ បើតាមក្រសួងធនធានទឹក ព្យុះនេះពុំមានឥទ្ធិពលធ្ងន់ធ្ងរមកលើកម្ពុជាឡើយ។
បើតាមក្រសួងធនធានទឹក រយៈពេល៨ថ្ងៃ ចាប់ពីថ្ងៃទី១២-១៩ ខែសីហា តំបន់វាលទំនាប ដែលមានខេត្តកំពង់ធំ បន្ទាយមានជ័យ បាត់ដំបង ពោធិ៍សាត់ កំពង់ឆ្នាំង កំពង់ចាម ត្បូងឃ្មុំ ព្រៃវែង ស្វាយរៀង តាកែវ ណ្ដាល សៀមរាប និងរាជធានីភ្នំពេញ នឹងមានសីតុណ្ហភាពមធ្យមអប្បបរមា២៣អង្សា និងសីតុណ្ហភាពមធ្យមអតិបរមា៣៥អង្សា ហើយអាចនឹងមានភ្លៀងធ្លាក់ជាមួយរន្ទះ និងខ្យល់កន្រ្តាក់គ្របដណ្ដប់លើផ្ទៃដី២៥ភាគរយ។
ចំណែកតំបន់ខ្ពង់រាប ដែលមានខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និងតំបន់ជួរភ្នំក្រវាញ នឹងមានសីតុណ្ហភាពមធ្យមអប្បបរមា២៣អង្សា និងសីតុណ្ហភាពអតិបរមា៣៦អង្សា ហើយអាចនឹងមានភ្លៀងធ្លាក់ជាមួយរន្ទះ និងខ្យល់កន្រ្តាក់គ្របដណ្ដប់លើផ្ទៃដី៣០ភាគរយ។
រីឯតំបន់មាត់សមុទ្រ ដែលមានខេត្តកំពត កោះកុង ព្រះសីហនុ កែប និងជួរភ្នំបូកគោ នឹងមានសីតុណ្ហភាពមធ្យមអប្បបរមា២៣អង្សា និងសីតុណ្ហភាពមធ្យមអតិបរមា៣៤អង្សា ហើយអាចនឹងមានភ្លៀងធ្លាក់ជាមួយផ្គររន្ទះ និងខ្យល់កន្រ្តាក់គ្របដណ្ដប់លើផ្ទៃដី៣៥ភាគរយ។ ចំពោះរលកសមុទ្រមានកម្ពស់មធ្យមអប្បបរមា ០,៥០ម៉ែត្រ និងកម្ពស់មធ្យមអតិបរមា ១,៥០ម៉ែត្រ៕
About The Author
