សមត្ថកិច្ច ចុះធ្វើកិច្ចសន្យាលើកទី ២ ករណីហាង «សន្យា» នៅក្រុងតាខ្មៅ ចាក់ភ្លេងរំខានដល់អ្នកជិតខាង

កណ្តាល ៖ កាលពីយប់ថ្ងៃទី ២៧ ខែមករា ឆ្នាំ ២០២២ ភោជនីយដ្ឋាន និងផាប់ «សន្យា» ស្ថិតតាមបណ្តោយផ្លូវលេខ ២១A ក្រុងតាខ្មៅ ខេត្តកណ្តាល មិនត្រឹមតែបំពានវិធានការ «៣កុំ ៣ការពារ» ក្នុងការទប់ស្កាត់ ការរីករាលដាលជំងឺកូវីដ-១៩ ទេ តែបានចាក់ភ្លេងរំខាន ដល់អ្នកជិតខាងជាច្រើនលើកច្រើនសារ ដល់កណ្តាលអាធ្រាត្រជារៀងរាល់ថ្ងៃ ត្រូវសមត្ថកិច្ច ចុះទៅឲ្យធ្វើកិច្ចសន្យាជាលើកទី ២ ។តាមប្រភពព័ត៌មាន បានឲ្យដឹងថា ហាង «សន្យា» នេះ គឺតែងតែចាក់ភ្លេង និងច្រើនរាំ ឮខ្លាំងៗ ដល់កណ្តាលអាធ្រាត្រ ជារៀងរាល់យប់ ដោយមិនខ្វល់ពីការសម្រាក របស់ប្រជាពលរដ្ឋអ្នកជិតខាងឡើយ។ បញ្ហានេះ ប្រជាពលរដ្ឋក៏បានរាយការណ៍ ជូនសមត្ថកិច្ចជាបន្តបន្ទាប់មកដែរ ហើយក៏បានធ្វើកិច្ចសន្យា តែអ្នកគ្រប់គ្រងហាងមួយនេះ មិនស្តាប់ឡើយ នៅតែផ្គើន ដោយមិនដឹងអាងអំណាចអ្វី នោះទេ។