មន្រ្តីបរិស្ថានត្រូវបំពេញតួនាទីនិងភាកិច្ចដើម្បីសង្រ្គោះជីវិតប្រជាពលរដ្ឋ និងជួយការពារប្រទេសជាតិយើង…

ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នៅក្នុងពិធីជួបសំណេះសំណាលជាមួយមន្រ្តីរាជការក្រសួងបរិស្ថាន តំណាងក្រុមហ៊ុន វិស័យឯកជនមួយចំនួន នាទីស្តីការក្រសួងបរិស្ថាន នៅថ្ងៃសុក្រ ទី១១ ខែតុលា ឆ្នាំ២០២៤ បានថ្លែងថា បរិស្ថានគឺជាជីវិត។ បរិស្ថានស្អាត ក៏ធ្វើឱ្យជីវិតរស់នៅរបស់យើង និងសុខភាពរបស់យើងល្អទៅតាមនោះដែរ។ ហេតុដូចនេះ ភាពស្អាតមានសារៈសំខាន់ខ្លាំងណាស់ ដែលមន្រ្តីបរិស្ថានត្រូវបំពេញតួនាទីនិងភាកិច្ចឱ្យបានល្អ និងត្រូវអនុវត្តច្បាប់ឱ្យបានត្រឹមត្រូវ ដើម្បីសង្រ្គោះជីវិតប្រជាពលរដ្ឋ និងជួយការពារប្រទេសជាតិយើង។

ជាមួយគ្នានេះ ឯកឧត្តមរដ្ឋមន្រ្តី បានណែនាំឱ្យមន្រ្តីបរិស្ថានគ្រប់លំដាប់ថ្នាក់បំពេញការងារ ដើម្បីធានាជោគជ័យសម្រាប់ប្រជាពលរដ្ឋមានទម្លាប់ស្អាត ក៏ដូចជាធ្វើឱ្យកម្ពុជាស្អាតជារៀងរហូតតទៅ តាមរយៈភាពស្អាតចំនួន៣ ក្នុងនោះ៖

ក្នុងឱកាសនេះ ឯកឧត្តមបណ្ឌិត អ៊ាង សុផល្លែត បានជំរុញឱ្យមានការចូលរួមពីគ្រប់មន្រ្តីគ្រប់លំដាប់ថ្នាក់ អ្នកពាក់ព័ន្ធ ជាពិសេសយុវជនកម្ពុជា បង្កើនតួនាទីចូលរួមឱ្យបានច្រើនឡើងថែមទៀត ជាពិសេសជំរុញការចូលរួមចំណែក លុបបំបាត់សំណល់ប្លាស្ទិក ការសំអាតអនាម័យបរិស្ថាន រួមទាំងការទុកដាក់សំរាមឱ្យបានត្រឹមត្រូវ នៅតាមសហគមន៍ ផ្ទះសម្បែង សាលារៀន និងវត្តអារាម ជាដើម ការចូលរួមទប់ស្កាត់ការបំពុលគ្រប់រូបភាព លើដី ក្នុងទឹក និងខ្យល់ ទៅតាមច្បាប់ជាធរមាន។

សូមបញ្ជាក់ថា អនុលោមតាមយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ដឹកនាំដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាកម្ពុជា, ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានដឹកនាំបង្កើតនិងបានដាក់ចេញយុទ្ធសាស្រ្តចក្រាវិស័យបរិស្ថាន ដែលផ្តោលើសសរស្តម្ភចំនួន៣ គឺ ស្អាត បៃតង និងចីរភាព ក្នុងគោលបំណងប្រែក្លាយសក្តានុពលវិស័យបរិស្ថាន ឱ្យទៅជាឧត្តមប្រយោជន៍ពិតជាក់ស្តែង សម្រាប់ប្រទេសជាតិ និងប្រជាជនកម្ពុជាគ្រប់ជំនាន់៕