កម្លាំងជំនាញកម្ពុជា-ថៃ នៅរសៀលថ្ងៃទី១០ ខែមិថុនា ឆ្នាំ២០២៥នេះ បានឯកភាពសម្រួលដល់ការចេញ-ចូល របស់សិស្សានុសិស្សកម្ពុជា ដែលស្នាក់នៅក្នុងផ្សាររោងគ្លឿ
រាជធានីភ្នំពេញ ៖ កម្លាំងជំនាញកម្ពុជា-ថៃ នៅរសៀលថ្ងៃទី១០ ខែមិថុនា ឆ្នាំ២០២៥នេះ បានឯកភាពសម្រួលដល់ការចេញ-ចូល របស់សិស្សានុសិស្សកម្ពុជា ដែលស្នាក់នៅក្នុងផ្សាររោងគ្លឿ ឱ្យបានចូល-ចេញនៅពេលព្រឹកវេលាម៉ោង ០៦.០០-០៨.០០នាទីព្រឹក និងពេលល្ងាចវេលាម៉ោង ១៧.០០-១៨.០០នាទី ទាំងសិស្សមកពីប្រទេសកម្ពុជា និងប្រទេសថៃ ដែលត្រូវចេញចូលតាមច្រកទ្វារអន្តរជាតិប៉ោយប៉ែត ។
លោកឧត្តមសេនីយ៍ទោ ពេជ្រ វណ្ណា នាយករងទីចាត់ការការងារព្រំដែន អគ្គបញ្ជាការ ប្រធានការិយាល័យទំនាក់ទំនងព្រំដែនកម្ពុជា-ថៃ បានដឹកនាំគណប្រតិភូកម្ពុជា មានលោកអភិបាលក្រុងប៉ោយប៉ែត និងសមត្ថកិច្ចប្រចាំការ នៅច្រកទ្វារអន្តរជាតិប៉ោយប៉ែត ជួបសំណេះសំណាលជាមួយភាគីថៃ ដឹកនាំដោយលោកវរសេនីយ៍ឯក ប្រាក់ធីវ៉ាត់ ផើងប្រាភ័ត្ត មេបញ្ជាការរងកងកម្លាំងបូព៌ា(ថៃ) ជួយសម្របសម្រួលដល់ការចេញ-ចូល របស់សិស្សានុសិស្ស ដែលស្នាក់នៅក្នុងផ្សាររោងគ្លឿ ប្រទេសថៃ អោយបានចូល-ចេញនៅពេលព្រឹកវេលាម៉ោង ០៦.០០-០៨.០០នាទីព្រឹក និងពេលល្ងាចវេលាម៉ោង ១៧.០០-១៨.០០នាទី ទាំងសិស្សានុសិស្សថៃ ដែលចូលមកសិក្សានៅប្រទេសកម្ពុជា និងសិស្សានុសិស្សកម្ពុជា ដែលចូលទៅសិក្សានៅប្រទេសថៃ នៅច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ដោយចាប់ផ្ដើមអនុវត្តចាប់ពីថ្ងៃទី១១ ខែមិថុនា ឆ្នាំ២០២៥ ស្អែកនេះតទៅ រហូតដល់កងកម្លាំងបូព៌ា(ថៃ) មានការផ្លាស់ប្តូរ ។
ចំពោះអាណាព្យាបាលសិស្ស ព្រមទាំងភ្ញៀវជាតិ និងអន្តរជាតិ មធ្យោបាយទាំងអស់ នៅអនុវត្តការចេញ-ចូល នៅម៉ោងដដែល គឺចាប់ពីពេលព្រឹកម៉ោង ៩:០០នាទី ដល់ម៉ោង១៦:០០នាទីរសៀល នេះបើយោងតាមប្រភពនគរបាលច្រកទ្វារប៉ោយប៉ែត ។
សូមរំលឹកថា ក្រោយពីព្រឹត្តការណ៍នាថ្ងៃទី២៨ ខែឧសភា ឆ្នាំ២០២៥ ដែលកម្លាំងយោធាថៃបាន ចូលបើកការបាញ់ប្រហារមកលើលេណដ្ឋានកងទ័ពកម្ពុជា បណ្តាលឱ្យទាហានខ្មែរម្នាក់ពលីជីវិតយ៉ាង អាណោចអាធ័ម ស្ថិតនៅក្នុងភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ ក្រសួងមហាផ្ទៃ បានតាមដានយ៉ាងយកចិត្តទុកដាក់ និងពិនិត្យឃើញថា សភាពការណ៍នៅតាមបណ្តោយខ្សែបន្ទាត់ព្រំដែន កម្ពុជា-ថៃ បានវិវត្តប្រែប្រួលកាន់តែស្មុគស្មាញ ពិបាកប៉ាន់ស្មាន និងមានភាពផុយស្រួយ ដែលអាចឈាន ដល់ការប្រឈមមុខដាក់គ្នាផ្នែកកម្លាំងប្រដាប់អាវុធ ។
នាពេលថ្មីៗនេះ ភាគីថៃបានបិទ ឬផ្លាស់ប្តូរពេល វេលាចេញចូលឆ្លងកាត់ព្រំដែន នៅតាមទីស្នាក់ការត្រួតពិនិត្យច្រកទ្វារព្រំដែនមួយចំនួនជាឯកតោភាគី ដោយមិនបានជូនដំណឹងផ្លូវការជាមុនមកភាគីកម្ពុជា ដូចមានចែងក្នុងកិច្ចព្រមព្រៀងរវាងរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាល នៃព្រះរាជាណាចក្រថៃ ស្តីពីការឆ្លងកាត់ព្រំដែនរវាងប្រទេសទាំងពីរ នោះឡើយ ៕
About The Author
